ભક્તિનિધિ – કડવું ૪૪

વિવેચન

આ ભક્તિનિધિ ગ્રંથ જે આત્મસાત કરીને તેનું ગાન કરશે તે સાચો ભક્ત થઈ શકશે. સાચી ખોટી ભક્તિનો તફાવત તેને દેખાય આવશે. ત્યારે સાચી ભક્તિ કરીને બીજા બંધનથી પણ મુકાઈ જશે. ખરાખોટાની પરખ જ્યારે પડશે ત્યારે તે જરૂર વિચારશે. આંધળી દોટ નહિ મુકે. સાચી ભક્તિને હૃદયમાં ધારશે.

એક માત્ર મહારાજની ભક્તિથી આત્મકલ્યાણ ઇચ્છશે. પોતાનું કલ્યાણ કરવામાં ભક્તિને અજોડ જાણશે. એને જ ભક્તિ હૃદયમાં ભાવશે ભક્તિના ગુણ બીજાને પણ કહેશે. મનમાં પણ એમ માનશે કે જેનો જેનો ઉધ્ધાર થઈ ગયો છે કે થાય છે તે મહારાજની ભક્તિથી જ થયો છે. માટે મોટા મોટાએ ભક્તિનો મહિમા ખુબ જ ગાયો છે પણ તે પ્રગટની ભક્તિનો, પ્રગટની સેવાનો મહિમા ગાયો છે એમ ડાહ્યા સાધકોએ જાણવું. પરોક્ષ ભક્તિમાં મનધાર્યાનું પ્રધાનપણ રહે છે પ્રગટની ભક્તિમાં ભગવાનના ગમતાનું, ભગવાનની રૂચીનું અને ભગવાનની અનુવૃતિનું પ્રધાન પણ રહે છે. ભક્તિ કરે છે. માટે કોઈને પોતાનું ગમતું છોડીને કેવળ ભગવાનનું ગમતું કરવાની હિંમત ઉઠતી નથી પછી પોતાની અનુકુળતા પ્રમાણે મનમાની ભક્તિનો નોખો વાડો બાંધીને ચલાવે છે પછી પાછળના પણ જ્યાં જેને બેસતુ આવ્યું અને પોતપોતાની ખ્વાઈશ પુરી થાય એવું લાગ્યું ત્યાં ભળી જઈને ભગત બની રહે છે. નિષ્કુળાનંદ સ્વામી કહે છે એવા મનમુખી ભગતથી આખુ બ્રહ્માંડ ભર્યું છે કોઈ જગ્યા એવા ભગત વિના ખાલી નથી. ભગતને નામે તાણ્ય નથી. સ્વામી કહે છે ભગવાનની સાચી ભક્તિ કેમ કરવી તેનું વર્ણન મે ખુબ કર્યું છે શુભ આશયવાળા ભક્તો ચેતીને તે પ્રમાણે કરજે.