ભક્તિનિધિ – કડવું ૨૯

રાગ:- ધન્યાસરી

વિવેચન

સાચા ભાવમાં કરેલી ભગવાનની ભક્તિ એ દોયલા દિવસની અર્થાત્ સંકટ સમયની મૂડી છે. ઘણું કરીને સંકટ સમયમાં કોઈ પ્રકારની મૂડી કામમાં આવતી નથી. ભગવાનની ભક્તિ એવી છે કે તે વિશેષે કરીને સંકટના સમયમાં આપણા જીવને ઉગારી લેનારી છે એમાં રતિભાર પણ ફેર નથી આ સંસાર સાગર તરવા માટે ભક્તિ છે તે મજબુત હોડી છે જે સંસારની પાર ઉતારી દેનારી છે સાગરને તરવા તેના સિવાય સોયે સો ઉપાયો કોઈ કરે તો પણ તે પાર ઉતારનારા થતા નથી. વ્યર્થ પ્રયત્નો બની રહે છે તેમ ભક્તિ વિના ભવજળ તરવા માટે પ્રયત્ન કરવા તે તેવું છે. જેમ ખાધા વિના ભૂખ દૂર ન થાય, જળપાન કર્યા વિના તૃષા દૂર ન થાય તેમ મહારાજની ભક્તિ કર્યા વિના ભવદુઃખ દૂર થવાના કોઈ ઉપાય નથી. જેમ મોટા પર્વતને ભીંજવવો હોય તો વરસાદ વિના તે ભીંજવી શકાતો નથી. સૂર્ય વિના રાત જતી નથી. તેમ ભક્તિ વિના પરમાત્માનું મોટુ સુખ પ્રાપ્ત થનારૂ છે નહિ. જેમ પ્રાણધારીના પ્રાણ આહારના એક માત્ર આધારથી ટકે છે તેમ સર્વે સુખ ભગવાનની ભક્તિને આધારે છે. જળચર પ્રાણીઓને જળ એજ જીવન છે વનચરને વનમાં જ પોતાના જીવનનો આધાર છે તેમ ભગવાનના ભક્તને

ભગવાનની સેવા કરવી એ જ જીવન હોવું જોઈએ. (જીવન દોરીનું વચનામૃત મ.પ્ર. ૨૮) જેમ જળચર પ્રાણીઓ તો માછલા, દેડકા, કાચબા બધા જ કહેવાય પણ જળ એ જ જીવન જેનું છે જળ વિના તડફડીને મૃત્યુ થાય એવું જળચર તો માછલું એક જ કહેવાય. દેડકા, કાચબા તો જમીન પર પણ આંટો મારીને તેને જળ દૂર થતા પ્રાણ જાય એવું બંધન નથી તેમ સાચા ભક્તને માછલાને પાણીનું જેમ તેમ ભગવાનનું અને તેની ભક્તિનું બંધન હોવું જોઈએ. એના વિના તો બીજા પામર છે એમ જાણવું માટે ભગવાનના ભક્તને નિર્ભય પદને પામવા માટે માછલા જેવી અચળ ટેક રાખીને આદર પૂર્વક ભગવાનની ભક્તિ આદરવી.